اسلام آباد(جنگ): پاکستان الیکٹرانک میڈیا ریگولیٹری اتھارٹی (پیمرا)نے تمام ٹی وی چینلز کو نشریات بحال کر نے کا حکم دے دیا ہے ۔ اس سلسلے میں پیمرا کی جانب سے تمام نیوز چینلز کو گائیڈ لائنز جاری کر دی گئی ہیں۔
گزشتہ روز اسلام آباد میں دھرنا مظاہرین کو منتشر کرنے کے لئے کئے گئے آپریشن کے دوران پیمرا نے نیوز چینلز کی نشریات بند کردی تھیں۔
فیض آباد دھرنے سے پیدا صورتحال سے نمٹنے کی حکمت عملی کے لیے وزیراعظم شاہد خاقان عباسی کی زیرصدارت امن وامان سے متعلق اہم اجلاس ہوا، جس میں وزیراعلیٰ پنجاب شہباز شریف، وزیر داخلہ احسن اقبال اور پولیس کے اعلیٰ حکام نے شرکت کی۔
اجلاس میں آپریشن کے بعد کی صورتحال اور آئندہ حکمت عملی پرغور کیا گیا۔
