اسلام آباد (اردوپوائنٹ اخبارتازہ ترین۔ 19جنوری 2022ء ) پاکستان مسلم لیگ ن کے قائد اورسابق وزیراعظم میاں محمد نواز شریف نے کہا ہے کہ ہم پاکستان کوان معاشی مشکلات سے نکالیں گے ،عمران خان کے چار سال میں لوگ بدحال ہوئے، ملک اور قوم کے ساتھ گھناوٴنا مذاق کیا گیا۔ انہوں نے لندن میں میڈیا سے گفتگو کرتے ہوئے کہا کہ ہم پاکستان کوان مشکلات سے نکالیں گے، عمران خان کے چارسال کا موازنہ میرے چار سالوں سے کریں،عمران خان کے چار سال میں لوگ بدحال ہوئے۔
ملک کے خراب حالات ٹھیک کرنا ہماری ذمہ داری ہے۔ پاکستان مشکل سے باہر نکلے گا ہم پاکستان کو مشکل سے نکالیں گے، یہ ممکن نہیں کہ پاکستان دوبارہ اپنے پاؤں پر کھڑا نہ ہوسکے، ہم نے پہلے بھی پاکستان کی بڑی خدمت کی ہے۔ عمران خان کے دور میں جو باتیں کی تھیں وہ سب سن چکے ہیں، میرا گوجرانوالہ کا جلسہ بھی یاد کریں جب میں کہا تھا کہ فلاں فلاں خرابیوں کے یہ ذمہ داری ہے، پاکستان کے ساتھ جو ستم ظریفی اورظالمانہ سلوک کیا گیا ، اس کو بتانا اور ٹھیک کرنا ہماری ذمہ دارہے، ملک اور قوم کے ساتھ گھناوٴنا مذاق کیا گیا، نہ کسی کی شکل اور نہ ہی نام چھپا ہوا ہے سب جانتے ہیں۔
اس سے قبل جیو نیوز کے مطابق پاکستان مسلم لیگ ن کے قائد سابق وزیراعظم نوازشریف کی زیرصدارت لندن میں حسین نواز کے دفتر میں پارٹی رہنماوٴں کا اجلاس ہوا، اجلاس میں سینئر نائب صدر مریم نواز، رانا ثناء اللہ، پرویزرشید اور جاوید لطیف ودیگر شریک ہوئے۔ اجلاس میں ملک کی سیاسی اورمعاشی صورتحال پر بریفنگ دی گئی۔ اجلاس میں قائد ن لیگ نوازشریف کی وطن واپسی سے متعلق غور کیا گیا۔
چیف آرگنائزر ن لیگ مریم نواز نے ایک سوال کے جواب میں کہا کہ وطن واپسی کی تاریخ فائنل ہوتے ہی بتا دوں گی۔وزیرداخلہ رانا ثناء اللہ نے کہا کہ نوازشریف کاپاکستان پہنچنے پر فقیدالمثال استقبال ہوگا، مریم نواز کی قیادت میں کام کرنے کو تیار ہوں، پنجاب کا اگلا وزیراعلیٰ مسلم لیگ ن سے ہوگا، قومی اسمبلی اپنی مدت پوری کرے گی۔ پارٹی کے تنظیمی امور اور ملکی سیاسی صورتحال پر نوازشریف سے رہنمائی لیں گے۔
پی ڈی ایم ضمنی الیکشن میں حصہ نہیں لے گی بلکہ عام انتخابات میں جائے گی، دو مہینے کے الیکشن میں جانے کا کوئی فائدہ نہیں ہوگا، اس بار عمران خان کا پٹا کھول دیں گے۔ انہوں نے کہا کہ عمران خان 35 یا 70 حلقوں سے الیکشن لڑیں، ہماری طرف سے آزاد ہیں،عمران خان کی گرفتاری ہونی چاہیے۔ ہم اکتوبر میں ہونے والے عام انتخابات میں حصہ لیں گے، زیادہ امکان ہے پی ڈی ایم ضمنی الیکشن میں نہیں جائے گی، 2 ماہ بعد الیکشن میں جانے کا کوئی فائدہ نہیں ہے۔
ن لیگی رہنماء جاوید لطیف نے کہا کہ صحافی حقیقت سامنے لے کر آیا ہے، ہماری حکومت میں ماضی میں ہمارے خلاف کاروائی کی گئی تھی۔ اداروں میں بیٹھے لوگ اتنے طاقتو رنہیں ہونے چاہئیں۔ پارٹی رہنماء رہنمائی کیلئے نوازشریف کو کسی بھی وقت طلب کرسکتے ہیں، حکومت ملے سات آٹھ ماہ نہیں ڈیڑھ ماہ ہوا ہے۔
